काठमाडौँ – काठमाडौँबाट सिरहातर्फ जाँदै गरेको गाडीबाट साढे तीन लाख रुपैयाँ नगद र १२ लाख २६ हजार रुपैयाँ बराबरको गरगहना बरामद भएको छ ।

सेना र प्रहरीको संयुक्त चेकिङ टोलीले बीपी राजमार्गमा चेकजाँच गर्ने क्रममा काभ्रेको भकुण्डेबेँसीमा बा.प्र.०१- ००६ ख ९१७३ नं. को विद्युतीय गाडीबाट उक्त परिमाणमा नगद र गरगहना बरामद गरेको हो ।

गाडीमा सिरहा भगवानपुर गा.प -२ बस्ने वर्ष १८ को नरेशकुमार यादव सवार थिए । गाडी खानतलासी गर्दा निजले बोकेको झोलाबाट स्रोत नखुलेको नग‍द तीन लाख ५० हजार ३०० र १२ लाख २६ हजार ९४ रुपैयाँ ३९ पैसा बराबरको गरगहना फेला परेको थियो ।

यादवले बोकेको झोलामा नगदसहित एक थान छड्के तिलहरी, मंगलशुत्र एक थान, बेरुवा औँठी एक थान र सिक्री तीन थान भेटिएको जिल्ला प्रहरी कार्यालय काभ्रेका डीएसपी तथा सूचना अधिकारी मीनबहादुर घलेले जानकारी दिए ।

बरामद नगद र गरगहनाको स्रोत खुल्न नसकेको काभ्रे प्रहरीले जानकारी दिएको छ ।