काठमाडौँ – भारतले नेपालबाट लैजाने बिजुलीको परिमाण १०१०.९ मेगावाट पुर्‍याएको छ । यसअघि विभिन्न आयोजनाबाट उत्पादित ८१०।९ मेगावाट बिजुली लगिरहेको भारतले नेपालसँग थप २०० मेगावाट बिजुली मागेको हो ।

नेपाल विद्युत प्राधिकरणले दिएको जानकारी अनुसार, नेपालबाट थप २०० मेगावाट बिजुली पठाउन भारतले सहमति दिएको छ । पाँच जलविद्युत् आयोजनाबाट उत्पादित बिजुली आयातका लागि भारत सरकारले अनुमति दिएको नेपाल विद्युत प्राधिकरणले जनाएको छ ।

चीनसँगको टकरावका कारण आफैँले चिनियाँ सङ्लग्नता बिनाका आयोजना छानेर बिजुली लैजाने गरेको नयाँ दिल्लीले काठमाडौँलाई आफूकहाँ बिजुली पठाउने थप पाँच आयोजनाको लिस्ट पनि स्वीकृत गरेको छ । लोअर सोलु, सुपर काबेली ए, ठूलो खोला, लिखु खोला ए र लिखु-२ आयोजनाबाट उत्पादित बिजुली भारतले लैजाने भएको हो ।

भारतले थप २०० मेगावाट विद्युत आगामी अक्टोबर ३१ सम्म लैजानेछ । स्वच्छ ऊर्जा उपलब्धतामा दबाब खेपिरहेको भारतले त्यसपछि पनि नेपालको निर्यात क्षमता कायम रहेमा विद्युत आयातमा निरन्तरता दिने प्राधिकरणका अधिकारीहरूले बताएका छन्‌ ।

नेपालले भारतमा बिजुली निर्यात गरी गत आर्थिक वर्ष २०८१र८२ मा १७ अर्ब ४७ करोड रुपैयाँ आम्दानी गरेको छ । विद्युत निर्यात परिमाण बढेकाले आम्दानी पनि बढ्ने प्राधिकरणले अनुमान गरेको छ ।

नेपालले बङ्गलादेशलाई पनि भारतीय प्रसारणलाइन हुँदै गएको जेठ मसान्तदेखि ४० मेगावाट बिजुली पठाइरहेको छ ।