काठमाडौं – लिभरपुलले डिएगो जोटाले प्रयोग गर्ने गरेको २० नम्बर जर्सी फेरि प्रयोग नगर्ने निर्णय गरेको छ। क्लब अधिकारीले जोटाको परिवारसँगको भेटमा सल्लाह गरेर यो निर्णय गरेको जनाएको छ। जोटा र उनका भाइ आन्द्रे सिल्भाको कार दुर्घटनामा मृत्यु भएको थियो।

२० नम्बरको जर्सी क्लब र एकेडेमी तहमा पनि प्रयोग नगर्ने निर्णय गरेको छ। क्लबले जारी गरेको विज्ञप्तिमा जोटाले क्लबमा बिताएको ५ वर्षको समयमा राम्रो फुटबल मात्र खेलेको नभई खेलाडीलाई अघि बढ्न सधैँ प्रेरित गरेको बताए।

सन् २०२० मा उल्भ्सबाट लिभरपुल पुगेका जोटाले यस बीचमा क्लबका लागि १८२ खेलमा सहभागिता जनाउँदै ६५ गोल गरेका थिए।

लिभरपुलले जोटाको सम्मानमा आयोजना गरेको कार्यक्रममा उनी धर्मपत्नी रुट कारडोसो लगायत परिवारका अन्य सदस्यको उपस्थिति थियो।