काठमाडौं- भारतले अष्ट्रेलियाका पानीजहाजको मर्मतका लागि सहयोगको प्रस्ताव गरेको छ । भारतले अष्ट्रेलियाका नौसैनिक एवम् व्यवसायिक पानीजहाजको मर्मतका लागि सहयोगको प्रस्ताव गरेको हो ।

यस सहकार्यले हिन्द प्रशान्त क्षेत्रमा दुई मुलुकबीचको रणनीतिक साझेदारी थप मजबुत हुने भारतीय पक्षको अपेक्षा छ । भारतले अष्ट्रेलियाका पानीजहाजका लागि ‘मेन्टिनेन्स, रिपेयर र ओभरहल’ (एमआरओ) सेवाका लागि प्रस्ताव गरेको इण्डियन डिफेन्स रिसर्च विङले उल्लेख गरेको छ ।

पछिल्लो समय भारत एमआरओ सेवाका लागि महत्वपूर्ण केन्द्रका रुपमा स्थापित भएको छ । भारतमा मजगाओ डक शिपबिल्डिर्स लिमिटेड, लार्सेन एण्ड टर्बो शिपयार्ड, गार्डेन रिच शिपबिल्डर्स एण्ड इन्जिनियर्सजस्ता कम्पनीले सञ्चालन गर्ने शिपयार्डहरुले यस्तो सेवा प्रदान गर्दै आएका छन् ।

पछिल्लो समय हिन्द प्रशान्त क्षेत्रमा चिनियाँ गतिविधि बढिरहेका बेला भारतले अष्ट्रेलियासमक्ष यस्तो प्रस्ताव राखेको हो । औद्योगिक पूर्वानुमान अनुसार सन् २०३२ सम्म विश्वभर पानीजहाज मर्मतको बजार ५३ अर्ब २३ करोड अमेरिकी डलर बराबर पुग्ने अपेक्षा गरिएको छ ।