सुनसरी– धरान बास्केटबल संघको आयोजनामा असार ५ गतेदेखी धरानको डिपो आदर्श बहुमुखी क्याम्पसको बास्केटबल कोर्टमा प्रथम कोशी प्रदेशस्तरीय खुल्ला बास्केटबल प्रतियोगिता हुने भएको छ । 

कोशी प्रदेश खेलकुद विकास बोर्डको संयोजनमा हुने प्रतियोगिता असार ५ देखि ८ गतेसम्म सञ्चालन हुने छ । प्रतियोगिताको उपाधि विजेताले नगद पुरस्कार २ लाख, उपविजेताले १ लाख प्राप्त गर्ने छ । व्यक्तिगत विद्या तर्फ सर्वोत्कृष्ट खेलाडीलाई नगद १० हजार रुपैयाँ प्रदान गरिने संयोजक विकास चाम्लिङ राईले जानकारी दिए ।

आफ्नो जिल्लाको प्रतिनिधित्व गरेर आउने टिमलाई मात्र प्रतियोगितामा सहभागी गराइने आयोजकले जनाएको छ ।

कोशी प्रदेशका सुनसरी, झापा, मोरङ, धनकुटा, इलाम, ओखलढुङ्गा, उदयपुर र भोजपुर गरी ८ जिल्लाका टिमहरू सहभागीताका लागि सम्पर्क गरिसकेको  आयोजक सदस्य सुनसरी बास्केटबल सङ्घका अध्यक्ष नारायण सुवेदीले बताए ।