पोखरा- नेपाल इन्जिनियरिङ काउन्सिलद्वारा पहिलोपटक त्रिभुवन विश्वविद्यालय अन्तर्गतको पश्चिमाञ्चल क्याम्पस लामाचौर, पोखरामा सञ्चालन गरिएको साधारण दर्ता परीक्षा सफलतापूर्वक सम्पन्न भएको छ।

२०८१ साल चैत २९ र ३० गते सम्पन्न उक्त परीक्षाका लागि २६७ जनाले आवेदन दिएका थिए । तर, २५७ जना मात्र परीक्षामा सहभागी भए । परीक्षा परिणामअनुसार १४७ जना परीक्षार्थी सफल भएका छन्, जसअनुसार करिब ५७ प्रतिशतको सफलता दर देखिएको छ ।

यो सफलता दरले गण्डकी प्रदेशमा रहेका नवइन्जिनियरहरूबीच बढ्दो पेशागत जिम्मेवारी, तयारी र सचेतनाको संकेत गर्ने बताइएको छ। पहिलोपटक क्षेत्रीय क्याम्पसमै परीक्षा आयोजना गरिनु इन्जिनियरहरूको पहुँचमा सहजता ल्याउन तथा उनीहरूको सहभागिता अभिवृद्धि गर्नेतर्फ काउन्सिलको सकारात्मक पहलको रूपमा हेरिएको छ।

परीक्षाको सफल आयोजनाले आगामी दिनमा अन्य प्रादेशिक क्याम्पसहरूमा पनि परीक्षा विस्तार हुने अपेक्षा गरिएको छ।