काठमडौँ- ऊर्जामन्त्री कुलमान घिसिङको संरक्षणमा पूर्वऊर्जा सचिव अनुप उपाध्यायको अध्यक्षतामा मंगलबार निर्वाचन आयोगमा उज्यालो नेपाल पार्टीको विवरण अध्यावधिक भएको छ।

अध्यावधिकका लागि उपाध्यायसहित ५१ जना केन्द्रीय सदस्यको नाम पनि आयोगमा बुझाइएको थियो। बुझाइएको सूचीको २९ नम्बरमा नाम थियो सुभाष प्रधान।

तर उनै प्रधानले आफूलाई जानकारी नै नदिई पार्टीको केन्द्रीय सदस्यमा आफ्नो नाम राखिएको भन्दै आपत्ति जनाएका छन्।

उनले आफूले नयाँ दल आए पुराना दल सच्चिन्थे कि भनेर भन्दै आएको भए पनि सहमतिबिना नाम राखिएको भन्दै असहमति व्यक्त गरेका छन्।

‘मेरो नाम कुनै राजनीतिक दल मा समावेश भएको सुनेँ। मेरो सहमति छैन,’ उनले भनेका छन्, ‘पुराना दलहरू सच्चिनु पर्ने गरी नयाँ दल आए प्रेसर हुने थियो भन्ने दृष्टिकोणमा सबैसँग वार्ता भएको हो। तर बिना सहमति आएको अर्थमा मेरो स्पष्ट असहमति भएको सबैलाई जानकारी गराउन चाहन्छु।’