काठमाडौं– युक्रेनका राष्ट्रपति भोलोदिमिर जेलेन्स्कीले भारतीय प्रधानमन्त्री नरेन्द्र मोदीसँग टेलिफोन वार्ता गरेका छन् । वार्ताका क्रममा जेलेन्स्कीले सेप्टेम्बरमा संयुक्त राष्ट्रसंघको महासभामा मोदीसँग व्यक्तिगत रूपमा भेट्ने प्रस्ताव राखेका छन् ।

युक्रेन र रूसबीच युद्ध भइरहेको अवस्थामा यो टेलिफोन वार्तालाई महत्वपूर्ण मानिएको छ । भारतीय सञ्चार माध्यमका अनुसार जेलेन्स्कीले भारतको तटस्थ भूमिकाको प्रशंसा गर्दै शान्ति स्थापनाका लागि सहयोग मागेका छन् । भारतीय समाचार संस्था एएनआईका अनुसार युक्रेनले भारतसँग कूटनीतिक र मानवीय सहायता बढाउन चाहेको बताइएको छ ।

प्रधानमन्त्री मोदीले भारत युक्रेनमा सदैव शान्तिको पक्षमा रहेको बताउँदै मानवीय सहायता प्रदान गर्न तयार रहेको जवाफ दिएका थिए । उनले युद्धको चाँडो अन्त्य होस् भन्ने भारतको चाहना रहेको पनि दोहोर्‍याए ।