काठमाडौं- युक्रेनका राष्ट्रपति भोलोदिमिर जेलेन्स्कीले आफ्नो सेना चीन, पाकिस्तान, मध्य एशिया र अफ्रिकी मुलुकका भाडाका सैनिकसँग लडिरहेको बताएका छन् । उत्तरपूर्वमा रहेको द्वन्द्वग्रस्त खार्किभ क्षेत्रको भ्रमणपछि उनले रुसले यस्ता भाडाका सैनिक परिचालन गरेको आरोप लगाएका हुन् ।

उनले यसको जवाफ दिने दृढता पनि व्यक्ति गरेका छन् । समाचार संस्था रोयटर्सका अनुसार उनले आफ्ना सेनाले उत्तरपूर्वी युक्रेनमा चीन, पाकिस्तान, ताजिकिस्तान, उज्बेकिस्तान र अफ्रिकी देशहरूबाट आएका विदेशी भाडाका सैनिकहरूसँग लडिरहेको बताएका हुन् ।

जेलेन्स्कीले यसअघि पनि रुसले युक्रेनविरुद्धको युद्धमा चिनियाँ लडाकुहरूलाई भर्ती गरेको आरोप लगाएका थिए ।

चीनले यस्तो आरोप अस्वीकार गर्दै आएको छ । रुसले उत्तर कोरियाका हजारौँ सैनिकलाई पनि युक्रेनको कुर्स्क क्षेत्रमा तैनाथ गर्दै आएको छ ।