काठमाडौं- भारतले फिलिपिन्सका नागरिकहरूलाई निःशुल्क इ–भिसा प्रदान गर्ने भएको छ । भारतले यही वर्षको अगस्त १ देखि आगामी वर्षको जुलाई ३१ सम्म फिलिपिन्सका नागरिकलाई निःशुल्क भिसा प्रदान गर्ने भएको हो । यी निःशुल्क भिसाको म्याद ३० दिनको हुने जनाइएको छ ।

फिलिपिन्सका राष्ट्रपति फर्डिनान्ड मार्कोस जुनियरको भारत भ्रमणमा क्रममा भारतले यस्तो घोषणा गरेको हो । यो भिसाका लागि फिलिपिन्सका नागरिकले अनलाइनमार्फत आवेदन गर्न सक्ने भारतीय समाचार संस्था एएनआईले जनाएको छ ।

यो भिसाको म्याद थप गर्न पाइने छैन । त्यसैगरी यो भिसा लिएर संरक्षित एवम् प्रतिबन्धित क्षेत्र तथा सुरक्षाका हिसाबमा संवेदनशील क्षेत्रहरूको भ्रमणका लागि पनि मान्य हुनेछैन ।

यो कदमले भारत र फिलिपिन्सबीचको पर्यटन र आर्थिक सम्बन्धलाई थप मजबुत बनाउने अपेक्षा गरिएको छ ।