काठमाडौं- पाकिस्तानको खैबर पख्तुनख्वा प्रान्तमा वर्षासँग सम्बन्धित घटनाहरूमा कम्तीमा ७१ जनाको मृत्यु भएको छ । यसरी मृत्यु हुनेमा आधाभन्दा बढी बालबालिका छन् । यी घटनामा ८६ जना घाइते भएका छन् ।

प्रान्तीय विपद् व्यवस्थापन प्राधिकरणले जारी गरेको तथ्याङ्क अनुसार मृत्यु हुनेमा ४० बालबालिका, १७ पुरुष र १४ महिला छन् । जुन महिनाको अन्त्यदेखि सेप्टेम्बरसम्म चल्ने मनसुनी वर्षाले खैबर पख्तुनख्वामा ठूलो विनाश मच्चाएको छ ।

बाढी, पहिरो र वर्षाजन्य विपद्ले भौतिक संरचनामा व्यापक क्षति निम्त्याएको छ । विपदमा परी स्वात जिल्लामा सबैभन्दा बढी २२ जनाको मृत्यु भएको छ । जुन २७ मा स्वात र मालाकन्द डिभिजनमा आएको अप्रत्याशित बाढीमा १७ जना पर्यटक बेपत्ता भएका थिए ।

जसमध्ये १२ जनाको शव फेला परेको छ । चार जनालाई उद्धार गरिएको छ र बाँकी एक जना अझै बेपत्ता छन् ।