काठमाडौं- हिमालयन सिद्ध महायोग ध्यान साधना केन्द्र पोखराले गुरुपूर्णिमादेखि चतुर्मास व्रत अनुष्ठान सुरु गरेको छ ।

अनुष्ठानका अवसरमा दैनिक भक्ति-दर्शनमा आधारित दिव्य सत्सङ्गसहित शनि मृत्युञ्जय षडाङ्ग रुद्राभिषेक, नवग्रहशान्ति, नाडी परीक्षण शिविर सञ्चालन भइरहेको केन्द्रका अध्यक्ष विष्णुप्रसाद शर्माले जानकारी दिए ।

पोखरा नदीपुरस्थित नरायणथानमा रहेको सिद्ध महायोग ध्यान साधना केन्द्रमा दैनिक बिहान ६ बजेदेखि ८ बजेसम्म सिद्ध महायोग ध्यान साधना सञ्चालन भइरहेको छ ।

यस्तै बिहान ८ बजेदेखि १२ बजेसम्म पूजा, हवन एवं शनि मृत्युञ्जय षडाङ्ग रुद्राभिषेक भइरहेको छ । प्रत्येक दिन साँझ ४ बजेदेखि ६ बजेसम्म भक्ति-दर्शन आधारित दिव्य सत्सङ्ग भइरहेको केन्द्र अध्यक्ष शर्माले जानकारी दिए ।

साधना शिविरमा उपप्रधान तथा सहरी विकास मन्त्री प्रकाशमान सिंह, गण्डकी प्रदेशका मुख्यमन्त्री सुरेन्द्रराज पाण्डे, वनमन्त्री भेषबहादुर पौडेल सहभागी भएका थिए । गण्डकी प्रदेश सांसदहरु प्रकाश बराल, रेखा गुरुङ सहभागी थिए ।

पोखरा महानगरका प्रमुख धनराज आचार्यले कृष्ण जन्माष्टमीका अवसरमा सुरु भएको सप्ताहपर्यन्त श्रीमदभागवद महापुराणको उद्घाटन गरेका थिए । व्रत अनुष्ठान तथा साधना शिविर चार महिनासम्म चल्ने बताइएको छ ।

*अपडेट गरिएको