काठमाडौं- भारतीय जनता पार्टी भाजपाका सांसद रविशंकर प्रसादले आतंकवादलाई क्यान्सरको संज्ञा दिएका छन् । बेलायत भ्रमणका क्रममा सांसद प्रसादले आतंकवादलाई क्यान्सरको संज्ञा दिएका हुन् ।

बेलायतको राजधानी लण्डनस्थित इण्डिया हाउसमा बोल्दै सांसद प्रसादले पाकिस्तानले अन्तर्राष्ट्रिय कोषको पैसा दुरुपयोग गरी आतंकवादमा लगानी गरिरहेको आरोप लगाए । बेलायतमा रहँदा भारतीय सांसदको टोलीले त्यहाँका सभामुख लिन्जी होयल छायाँ विदेशमन्त्री प्रिती पटेललगायतका नेताहरुसँग उच्चस्तरीय भेटवार्ता गरेको थियो ।

त्यसबाहेक सत्तारुढ लेबर पार्टी र विपक्षी कन्जरभेटिभ पार्टीका नेताहरुसँग पनि भेटवार्ता गरी आतंकवादविरुद्ध भारतको धारणाबारे जानकारी दिइएको थियो ।

पाकिस्तानी भूमिमा रहेका आतंककारी पूर्वाधारलाई लक्षित गरी भारतले सञ्चालन गरेको अपरेशन सिन्दुरबारे विश्वलाई जानकारी दिन सबै दलका सांसद सम्मिलित टोलीले विदेश भ्रमण गरेको हो ।

गत अप्रिल २२ का दिन भारतको जम्मु कश्मीरस्थित पहलगाम क्षेत्रमा एक जना नेपालीसहित २६ जनाको ज्यान जानेगरी भएको आतंककारी आक्रमणको बदलामा भारतले अपरेशन सिन्दुर सञ्चालन गरेको हो ।