मोरङ– गायक तथा सङ्गीतकार गौरव दर्पण मोरङको दर्पण कला साहित्य प्रवर्द्धन समितिको ‘वर्ष स्रष्टा सम्मान’बाट सम्मानित भएका छन् ।

मोरङको पथरी–शनिश्चरे नगरपालिकाद्वारा गठित उक्त समितिले गौरवलाई नगद २५ हजार रुपैयाँसहित दोसल्ला ओढाएर सम्मान गरेको हो ।

दुई दशकदेखि नेपाली गीतसङ्गीतको माध्यमबाट कला साहित्य प्रवर्द्धनमा लागेका गौरवले आफ्नै रचनामा गाएको ‘पूर्वै रमाइलो’ बोलको गीत देश विदेशमा रहेका नेपालीहरू माझ लोकप्रिय छ ।

दर्पणले अहिलेसम्म दुईसय भन्दा बढी गीतमा सङ्गीत भरेका छन् । यस्तै, आफ्नै आवाजमा ३ वटा गीति एल्बम प्रकाशित गरेका छन् भने दुईवटा एल्बममा उनको एकल सङ्गीत रहेको छ ।

समितिले कलासाहित्यमा लामो समय योगदान गरेका स्रष्टाहरूलाई हरेक वर्ष सम्मान गर्दै आएको छ । 

समितिले प्रथम पथरी–शनिश्चरे ‘सिङ्गिङ् एण्ड डान्सिङ आइडल’ कार्यक्रम पनि आयोजना गरेको थियो ।

उक्त कार्यक्रमका विजेता कलाकारहरूलाई पुरस्कार वितरण गरिएको थियो । कार्यक्रममा गायनतर्फ मुख्य निर्णायकको भूमिका रहेका गौरवले विजेतालाई व्यक्तिगत र सुरसंगम रेकर्डिङ स्टुडियो, काठमाडौंको तर्फबाट एउटा गीत निःशुल्क रेकर्डिङको अवसर प्रदान गर्ने घोषणा गरेका थिए ।