काठमाडौं- हिन्दु धर्मका नाममा पटक पटक विवादमा पर्दै आएका विजय भण्डारी उर्फ विजय कृष्णमूर्तिको संस्थाले पोखरामा महायज्ञ तयारी गर्दै गर्दा उनका समर्थक धाक धम्कीमा उत्रिन थालेका छन् ।

पशुपति परिरमा कोटिहोम गरेर कयौँ विवादमा फसेका उनले पोखरामा पनि त्यस्तै विवाद झेलिरहेका छन् ।

ठगी आरोपी विजय भण्डारी उर्फ विजय कृष्णमुर्तीको संस्थाले पोखरामा कोटीहोमको तयारीका क्रममा गरेको होमबाट सल्किएको आगोबारे समाचार लेख्दा पत्रकार सुमन ढुंगानालाई धम्की दिइएको हो ।

मानवसेवा फाउन्डेशन नाम संस्थाको हवला दिँदै प्रेस चौतारी नेपालका केन्द्रीय सदस्यमेत रहेका ढुंगानाल धम्की दिइएको हो ।

बुधबार ‘कोटिहोमका नाममा धन्न ठूलो आगलागी हुनबाट जोगियो पोखरा’ शीर्षकमा सार्वजनिक गरेको भिडियोलाई लिएर ढुंगानालाई धम्की आएको हो ।

‘उक्त भिडियो सार्वजनिक किन गरिस् भन्दै मलाई जेसुकै हुने धम्की दिएका छन्’, उनले भने, ‘९७४५३००८६० नम्बरको मोबाइलबाट एक व्यक्तिले न्युज २४ मा हाम्रो पनि ठूलो चिनजान छ भन्दै जे पनि गर्न सक्ने भन्दै धम्की दिए।’

उनले आफूलाई धम्की दिने व्यक्तिविरुद्ध कानुनी उपचारमा जाने जानकारी दिएका छन् ।