काठमाडौं- प्रधानमन्त्री केपी शर्मा ओलीले त्रिभुवन विश्वविद्यालयका निवर्तमान उपकुलपति प्रा.डा. केशरजंग बरालले काम गर्न नसकेर राजीनामा दिएको बताएका छन् ।

बरालले प्रधानमन्त्रीकै असहयोगका कारण आफूले पदबाट राजीनामा दिन बाध्य भएको बताइरहेका बेला ओलीले शुक्रबार बुटवलमा आयोजित एमालेको प्रदेशस्तरीय जनजागरण सभालाई सम्बोधन यसो भनेका हुन् ।

उपकुलपति बरालको राजीनामा प्रकरणको चर्चा गर्दै ओलीले यस्तो टिप्पणी गरेका हुन् । ‘एउटा उपकुलपति काम गर्न सकेनछन्,  राजीनामा फ्याँकेछन्’, उनले भने, ’बरालको राजीनामा स्वीकृतिमा ढिलाइ हुनै उनै कारण हुन् । राजीनामा पत्र मकहाँ आइपुग्न समय लाग्दा स्वीकृति गर्न ढिला भएको हो।’

राजीनामा नै आफूकहाँ केही दिन लगाएर आएको उनले बताए । ‘मकहाँ राजीनामा पत्र नै कति दिनपछि आयो । राजीनामा स्वीकृत गर्दैन भन्छन् पत्र पत्रिकाले, राजीनामा आइपुगेकै छैन त कहाँबाट स्वीकृत गर्ने ?’, ओलीले भने, ‘न भेटेको छ, न राजीनामा गर्छु भनेको छ, न यस्तो समस्या भयो भनेको छ, राजीनामा कोहीमार्फत् पठाएको थियो रे ! त्यो पुग्न पाएको छैन अखवारबाजी भइसकेछ ।’

उनले पत्र आएपछि भेरिफाई गरेर राजीनामा स्वीकृत गरिदिएको बताए । राजीनामा स्वीकृत भइसकेपछि बरालले द्वन्द्वको कुरा उठाएको भन्दै प्रधानमन्त्रीले असन्तुष्टि जनाए ।

‘राजीनामा स्वीकृत गरेपछि प्रधानमन्त्री र उपकुलपतिबीच द्वन्द र लफडा जस्ता कुरा सुरु भएको सुनेँ, अचम्म लाग्यो’, उनले भने, ‘उपकुलपतिले मलाई यस्तो भयो भनेर एक शब्द भनेका छैनन् । तर अनेक हल्ला हुने गरेको छ ।’