भोजपुर- नेपाली कांग्रेसका महामन्त्री गगनकुमार थापाले शक्तिशाली आयोग बनाएर २०४६ सालदेखि सत्तामा बसेका नेता र पूर्वराजा ज्ञानेन्द्र शाहको पनि सम्पत्ति छानबिन गरिनुपर्ने बताएका छन् ।

शुक्रबार कांग्रेस भोजपुर जिल्ला कार्यसमितिको सम्मेलनलाई सम्बोधन गर्दै महामन्त्री थापाले सत्तामा बसेका सबैको तीनपुस्ते सम्पत्ति छानबिन गर्न शक्तिशाली आयोग चाहिने बताएका हुन् ।

थापाले अख्तियार दुरुपयोग अनुसन्धान आयोगको भूमिकामाथि प्रश्न उठाउँदै बार्गेनिङको माध्यम मात्रै बनाएको बताए ।

‘अख्तियारले अनुसन्धानको विषय छापामा ल्याउने गरेको छ । त्यसपछि वर्षौँसम्म ‘तँलाई थुन्दिऊँ’ भनेर नै बिताउने गरेको छ,’ उनले भने, ‘अब एउटा शक्तिशाली आयोग बनाऊँ। शक्तिशाली आयोगलाई ०४६ पछि सत्तामा बसेकाको सम्पत्ति छानबिन गर्ने अधिकार दिऊँ ।’

थापाले ०४६ पछाडि कांग्रेस, एमाले, माओवादी र नयाँ भनिएका दल पनि सत्तामा पुगिसेको बताए । सत्तामा पुगेका सबैको सम्पत्ति छानबिन गर्दा कांग्रेसका जो–जो परे पनि स्वीकार रहेको बताए । उनले त्यसको भारी पार्टीले नभई सम्बन्धित व्यक्त्तिले बोक्ने बताए ।

‘कांग्रेसका कति मान्छे पर्छन् परून् । त्यसको भारी किन बोक्ने हामी, जोसुकै परून्’, उनले भने, ‘जोसुकै नेता परे परून तर छानबिन गरौँ ।’