झापा- नेकपा एमालेनिकट राष्ट्रिय युवा संघ नेपाल झापाका इन्चार्ज खगेन्द्रराज आङ्देम्बे ‘राज’सहित तीन युवामाथि गएराति भएको आक्रमणमा संलग्न रहेको आरोपमा बिर्तामोड नगरपालिका-४ का खगेन्द्र खालिङ पक्राउ परेका छन् ।

खालिङलाई बिर्तामोडबाटै पक्राउ गरेर हिरासतमा लिइएको जिल्ला प्रहरी कार्यालयका प्रवक्ता खगेन्द्र बहादुर खड्काले जानकारी दिएका छन् । उनी पनि एमालेकै कार्यकर्ता भएको खुलेको छ ।

घटनामा अन्य युवासमेत संलग्न भएको आशंकामा प्रहरीले खोजी जारी राखेको खड्काले बताए ।

• युवासंघका झापा जिल्ला इन्चार्जसहित तीन जनामाथि खुकुरी प्रहार, अवस्था गम्भीर

गएराति हत्या गर्ने योजनासहित भएको आक्रमणबाट युवा संघका तीन युवा नेता गम्भीर घाइते भएका छन् । घाइतेहरूको बिर्तामोडस्थित बीएण्डसी अस्पतालमा उपचार भइरहेको छ ।

आक्रमणमा घाइते हुनेहरूमा आङ्देम्बेसहित विश्वदीप राजवंशी र अजय खवास छन् । इन्चार्ज आङ्देम्बेको आईसीयु र अरू दुईजनाको अर्थोवार्डमा उपचार भइरहेको छ ।

आङ्देम्बेलाई खुकुरी प्रहार गरिँदा उनको अनुहारमा गम्भीर चोट लागेको छ। अन्यको हात र शरीरका विभिन्न भागमा चोट लागेको छ ।

उनीहरूमध्ये आङ्देम्बेलाई बिर्तामोड–४ का खगेन्द्र खालिङले राति करिब १ बजे घरमा बोलाएका खुलेको छ। घरभित्र पस्न चेनगेटमा पुग्नेबित्तिकै खुकुरी प्रहार भएको प्रत्यक्षदर्शीले बताएका छन् ।

घाइते खवासले पत्रकारहरूलाई बताएअनुसार आङ्देम्बेको हत्या गर्ने उद्धेश्यले खुकुरी प्रहार भएको हो । ‘आङ्देम्बेलाई खुकुरी प्रहार गर्दा मैले रोक्ने प्रयास गरेँ’, खवासले भने ‘मेरा हातका ४ वटा औँला काटिए । आक्रमण योजनावद्ध गरिएको छ ।’

अर्का घाइते राजवंशीलाई भद्रपुर रोडस्थित दरबार रेस्टुरेन्टबाट ओर्लिएपछि मोटरसाइकलमा आएका त्यही समूहका ४ जनाले आक्रमण गरेका थिए ।

घटनाको जानकारी पाएपश्चात संलग्न अन्यको खोजी भइरहेको इलाका प्रहरी कार्यालय अनारमनीका प्रहरी निरीक्षक सन्तोष राईले बताएका छन् ।