काठमाडौं- काठमाडौं महानगरपालिकाका मेयर बालेन्द्र साहले हाल हलहरूमा प्रदर्शनरत चलचित्र ‘लाज शरणम’ हेरेका छन् ।

उनले हास्यकलाकार सीताराम कट्टेल ‘धुर्मुस’ र आफ्ना अघोषित सल्लाहकार अर्जुन घिमिरे ‘पाँडे’सहित दरबारमार्गस्थित हलमा पुगेर ‘लाज शरणम’ हेरेका हुन् । बालेन काठमाडौंको चुनावमा उठ्नु अघिदेखि नै पाँडे सहयोगीका रुपमा छन् ।

पछिल्लो समय ‘धुर्मुस’को अभियानमा निखार नपाइएको टिप्पणी भइरहेका बेला बालेनले भने तारिफ गरेका छन् । उनले ‘धुर्मुस’को खुलेर प्रशंसा गर्दा गजब अभिनय गरेको बताएका हुन् ।

गत फागुन १४ अर्थात् शिवरात्रिदेखि प्रदर्शन भइरहेको ‘लाज शरणम’मा धुर्मुसको अभिनय ‘लाउड’ र ‘कर्कश’ भएको टिप्पणी आएको थियो ।

बालेनले गएराति दरबारमार्गस्थित दरबार सिनेमाजमा ‘लाज शरणम’ हेरेपछि धुर्मुसको अभियनमा डिटेलिङ उत्कृष्ट देखिएको भन्दै तारिफ गरेका हुन् । बालेन आफ्ना सहयोगीमध्ये एक भिक्टर पौडेललाई लिएर हलमा पुगेका थिए ।

‘यस्तो डिटेल दिनुभा’छ नि ! कस्तो डिटेल दिया हो ! लास्टै दामी, लास्टै मजा आयो,’ बालेनले भनेका छन् ।

उनले धुर्मुसलाई बधाईसमेत दिए। सामाजिक सञ्जालमा आएका भिडियोमा बालेनले अगाडि भने, ‘एकदमै राम्रो काम गर्नुभएको छ। म पनि कलाकार हुँ, हामीलाई कला देखाउन पाए हुन्थ्यो भन्ने चाहना हुन्छ । हेरिरहँदा एकदमै मज्जा आयो।’

‘लाज शरणम’ मा बालेनको स्वरको र्‍याप गीत पनि हेर्न पाइन्छ । फिल्मले सुरूमा सुस्त देखिए पनि हलहरूमा अहिले राम्रो व्यापार गरिरहेको छ । तर अहिले ‘लाज शरणम’ का लागि ‘होस्टेल ३’ चुनौती बनेको छ।