मस्को- तीन वर्षदेखि जारी युद्ध समाप्त गर्न युक्रेनी र अमेरिकी अधिकारी साउदी अरबमा वार्ताका लागि जुट्दै गर्दै रूसको राजधानी मस्कोमा ठूलो संख्यामा ड्रोन हमला भएको छ ।

रूसी स्थानीय अधिकारीका अनुसार मस्कोमा गएराति भएको ‘सयौँ संख्याको ड्रोन हमलामा’ कम्तीमा पनि एकजना व्यक्तिले ज्यान गुमाएका छन् । घटनामा तीनजना घाइते भएका छन् ।

क्षेत्रीय गभर्नर आन्द्रेई भोरोबयेभले बताएअनुसार राजधानीबाहिर भिदनोये र डोमोडेडोभो क्षेत्रमा मानिसहरूको हताहती भएको हो । उनका अनुसार एक ठूलो भवनका सातवटा अपार्टमेन्टमा आक्रमणबाट क्षति पुगेको छ ।

मस्कोका मेयर सर्गेई सोभयानिनका अनुसार सहरको बाहिरी क्षेत्रमा ७३ वटा ड्रोनलाई खसालिएको छ । एक भवनको छतमा ड्रोन भग्नवाशेष खसेर क्षति भएको छ ।

हमलापछि मस्कोको एक जिल्लाको रेल नेट्वर्क बन्द गरिएको छ। अहिले त्यहाँको विमानस्थलमा उडान पनि रोकिएको छ।

यो आक्रमण रूस र युक्रेनबीच जारी युद्ध समाप्त गर्न साउदी अरबमा अमेरिकासँग वार्ता हुनुअघि भएको हो । यस आक्रमणबारे अहिलेसम्म युक्रेनले केही बोलेको छैन।