काठमाडौं- बैंकिङ कसूर तथा सजाय ऐन, २०६४ अन्तर्गत थप कसूरमा संलग्न रहेको आरोपमा प्रभु बैंक लिमिटेडका रेमिटेन्स विभाग प्रमुख सुगेन (सुजित) शाक्य पक्राउ परेका छन्।

उच्च अदालत पाटनबाट पक्राउ अनुमति लिएपछि शाक्यलाई बुधबार ललितपुर महानगरपालिका-११, ईखांछेबाट पक्राउ गरिएको हो । उनीमाथि थप अनुसन्धान जारी रहेको ब्यूरोले जनाएको छ।

नेपाल प्रहरीको केन्द्रीय अनुसन्धान ब्यूरो (सीआईबी) का अनुसार शाक्यले नियमविपरीत प्रभु म्यानेजमेन्ट प्रालीलाइ सुपर एजेन्ट बनाइ रेमिट्यान्स कारोबारका लागि एड्भान्स रकम उपलब्ध गराएका थिए।

उक्त कम्पनीसँग रेमिट कारोबार नै रोकिएको अवस्थामासमेत नेपाल राष्ट्र बैंकको निर्देशनविपरीत लामो समयसम्म उक्त रकम स्वार्थ समूहले प्रयोग गर्न दिँदा प्रभु बैंकलाई करिब ८ करोड ९३ लाख रुपैयाँभन्दा बढी हानी पुगेको प्रारम्भिक अनुसन्धानमा देखिएको सीआईबीले जनाएको छ।

यसभन्दा बाहेक त्यही कार्यलाई लुकाउन कर्जा प्रवाह गरी कर्जा दुरुपयोग गर्ने प्रक्रियामा प्रभु बैंकका सीईओ अशोक शेरचसमेत संलग्न भएको आरोपमा पक्राउ गरेर अनुसन्धान भइरहेको ब्यूरोले जनाएको छ।

रेमिट कारोबारका क्रममा प्री-फन्डिङ दिने कानुनी प्रावधानको दुरुपयोग गरी स्वार्थ समूहलाई फाइदा हुने गरी नियम विपरीत रकम उपलब्ध गराएको सीआईबीले जनाएको छ।

त्यस वापत बैंकले लिनुपर्ने ब्याजसमेत नलिएका कारण बैंकलाई एक अर्ब रुपैयाँभन्दा बढी हानी पुगेकोसमेत अनुसन्धानमा खुल्न आएको बताइएको छ।