काठमाडौँ – देशको सुरक्षा कमाण्ड सम्हालेको नेपाली सेनाले आज (बुधबार) बेलुकी पाँच बजेसम्म देशभर लागु हुनेगरी निषेधाज्ञा (कर्फ्यु) घोषणा गरेको छ ।

सेनाको जनसम्पर्क तथा सूचना निर्देशनालय जङ्गी अड्डाले भर्खरै एक विज्ञप्ति जारी गर्दै ‘देशको समग्र शान्ति सुरक्षा अवस्थालाई मध्यनजर राखी हाल लागु गरिएको निषेधाज्ञा आज मिति २०८२ भाद्र २५ गतेको बेलुकी ५ बजेसम्म देशभर निरन्तर रहने र तत्पश्चात् भोलि भाद्र २६ गते बिहान ६ बजे सम्म कर्फ्यू आदेश जारी रहने’ जनाएको हो ।

‘आन्दोलनको नाममा अझै पनि विभिन्न अराजक व्यक्ति र समुहहरुले घुसपैठ गरी व्यक्तिगत र सार्वजनिक सम्पत्ति तोडफोड तथा आगजनी, लुटपाट एवम् व्यक्ति लक्षित हिंस्रक आक्रमण, बलात्कारका प्रयास जस्ता क्रियाकलापहरु गरिरहेको र गर्नसक्ने सम्भावना रहेको हुँदा देशको समग्र शान्ति सुरक्षा अवस्थालाई मध्यनजर राखी सेनाले निषेधाज्ञा र कर्फ्यु घोषणा गरेको हो ।

निषेधाज्ञा तथा कर्फ्यूको दौरान अत्यावश्यक सेवाका सवारी साधनहरु (एम्बुलेन्स, शव वाहन, दमकल, स्वास्थ्यकर्मी र सुरक्षाकर्मीका सवारी साधनहरु) सञ्चालन हुन सक्ने विज्ञप्तिमा उल्लेख छ । आवश्यक सहजताको लागि नजिकमा रहेका सुरक्षाकर्मीहरुसँग समन्वय गर्न पनि सेनाले आग्रह गरेको छ ।

आन्दोलन पश्चातको परिस्थितिलाई सम्बोधन गरी समस्या समाधानको निमित्त सम्बद्ध पक्षहरुबीच समन्वय भइरहेको हुँदा आन्दोलनको नाममा हुने कुनै पनि प्रदर्शन, तोडफोड, लुटपाट, आगजनी, व्यक्ति तथा सम्पत्ति लक्षित आक्रमणहरुलाई दण्डनीय अपराधका रुपमा लिई सुरक्षाकर्मीबाट कडा हुने पनि सेनाले चेतावनी दिएको छ ।

अवकाश प्राप्त सैनिक लगायतका सुरक्षाकर्मीहरु, सबै सेवाका राष्ट्रसेवकहरु, सञ्चारकर्मी तथा आम नागरिकहरुमा अफवाहको पछाडी नलागी आधिकारिक सूचनाहरु मात्र सम्प्रेषण गर्न तथा आधिकारिकतामा मात्र विश्वास गर्न सेनाको अनुरोध छ । सुरक्षा र मानवीय उद्धारमा प्रतिबद्ध रहि परिस्थितिजन्य जिम्मेवारी वहनमा सक्रिय सुरक्षाकर्मीहरुलाई सहयोग पुऱ्याउन पनि अपिल गरेको छ ।

काठमाडौँ लगायत प्रमुख शहरमा अहिले पनि सेनाले निषेधाज्ञा जारी गरेको छ । अत्यावश्यक कामबाहेक घरबाहिर ननिस्कन आग्रह गरेको सेनाले बटुवाहरूलाई समेत यात्राको कारण र गन्तव्यबारे सोधखोज गरिरहेको छ । संवेदनशील क्षेत्र हुँदै आवतजावत गर्नुपरे आफ्नो सक्कल परिचय बोक्न आग्रह गरेको छ ।

सेनाको विज्ञप्ति :