काठमाडौं- पाकिस्तानमा पोलियो रोगका बिरामी बढ्दै गएका छन् । यस वर्षमात्र पाकिस्तानमा हालसम्म यस रोगका १८ जना बिरामी भेटिएका छन् ।

पाकिस्तान पोलियो उन्मूलन कार्यक्रम पीपीईपीले हालसम्म देशभर १८ जनामा पोलियो भाइरस पोजिटिभ केस फेला परेको घोषणा गरेको छ । यो केस खैबर पख्तुनख्वा प्रान्तको डेरा इस्माइल खाँ जिल्लाका एक जना बालकमा पुष्टि भएको हो ।

पीपीईपीका अनुसार डेरा इस्माइल खाँ पोलियोको लागि जोखिमपूर्ण सात जिल्लाहरूमध्ये एक हो । पोलियो रोग लागेका बालबालिकामा पक्षाघात हुने गर्छ ।

पोलियोको कुनै उपचार नभएकाले केवल रोकथाम मात्र सम्भव छ । पोलियो उन्मूलनका लागि पाकिस्तान सरकारले बारम्बार खोप अभियान सञ्चालन गर्दै आएको छ ।

यद्यपि पाकिस्तानका कतिपय समुदायले आफ्ना बालबालिकालाई पोलियो खाप दिन अस्वीकार गर्दै आएका छन् । पाकिस्तानमा पोलियो खोप अभियानमा संलग्न सुरक्षाकर्मी एवम् स्वास्थ्यकर्मीलाई लक्षित गरी आक्रमणका घटना पनि हुने गरेका छन् ।