डारविन – अस्ट्रेलिया र दक्षिण अफ्रिकाको पहिलो टी-२० आइतबार हुँदै छ। डारविनका हुने खेलअघि अस्ट्रेलिया उत्साहित छ। वेस्ट इन्डिजसँगको शृङ्खला ५-० ले जितेर उत्साहित भएको अस्ट्रेलियाको टोलीमा ट्रेभिस हेड फेरि फर्किएका छन्।

दोस्रो रोजाइका धेरै खेलाडीलाई मौका दिएको दक्षिण अफ्रिकाले जिम्बाबे सम्मिलित त्रिकोणीय शृङ्खलाको फाइनलमा न्युजिल्यान्डसँग झिनो हार व्यहोरेको थियो।

दक्षिण अफ्रिकी टोलीमा आइडन म्याक्रम र कासिगो रबाडा लगायत केही स्टार थपिने अनुमान गरिएको छ। दक्षिण अफ्रिकी प्रशिक्षक सुक्री कोनराडले केही युवा खेलाडी न्युजिल्यान्डको भ्रमणमा राम्रो लयमा रहेको बताए।

यी दुई टोलीले टेस्ट विश्व च्याम्पियनसिपको फाइनलपछि पहिलो पटक प्रतिस्पर्धा गर्न लागेका हुन्। सो फाइनलमा सफलता पाउँदै दक्षिण अफ्रिका कुनै पनि संरचनामा पहिलो पटक विश्व च्याम्पियन भएको थियो।