रसुवा- यही मंगलबार बिहान ३ बजे नेपाल-चीन सीमामा पर्ने लेन्देखोला (भोटेकोशी) मा आएको बाढीले रसुवाको स्याफ्रुबेँसी-टिमुरे सडक क्षतविक्षत बनाएको छ ।

बाढी र पहिरोको विध्वंशले यो सडक पूर्णरुपमा अवरुद्ध भएको छ । भोटेकोशी किनारको दर्जनौँ ठाउँमा गएको पहिरोका कारण सवारी साधन चलाउन सम्भव छैन । पैदल यात्रा गर्नसमेत चुनौतीपूर्ण छ ।

गोसाइँकुण्ड गाउँपालिका-३ लिङलिङमा सडक बाढीले बगाउँदा त्यस क्षेत्रमा जोखिम मोलेर यात्रा गर्नु पर्ने अवस्था छ ।

नेपाली सेना, प्रहरी र सशस्त्र प्रहरीले ठाउँ ठाउँमा बाटो बनाउने काम गरेका छन् । तर सवारी साधनका लागि सडक कहिले खुल्छ भन्न सक्ने अवस्था छैन ।

नेपाल-चीन जोड्ने प्रमुख सडक अवरूद्ध हुँदा काठमाडौं उपत्यका प्रवेश गर्ने सयौँ मालबाहक सवारी साधन टिमुरेमै थन्किएका छन् ।

रसुवागढी नाका पनि बाढी र पहिरोले ध्वस्त हुँदा उत्तरी छिमेकी चीनसँगको व्यापार करिब ठप्प भएको छ । २०७२ को भूकम्पपछि सिन्धुपाल्चोकको तातोपानी नाकाको अवस्था अझै सुधार भएको छैन ।

तस्बिरहरू : प्रकाशचन्द्र तिमिल्सेना/ नेपाल फोटो लाइब्रेरी