अमेरिकी विदेशमन्त्री मार्को रुबियोले तटस्थ स्थानमा वार्ता गर्न भारत र पाकिस्तान तयार भएको घोषणा गरेका छन् । सामाजिक सञ्जाल एक्समा पोस्ट गर्दै विदेशमन्त्री रुबियोले दुई मुलुक तटस्थ स्थानमा वार्ता गर्न तयार भएको जानकारी दिएका हुन् ।

उनले पछिल्लो ४८ घण्टा आफू र उपराष्ट्रपति जेडी भान्सले दुबै मुलुकका उच्च पदस्थ अधिकारीसँग कुराकानी गरेको जानकारी पनि दिए । उनले भारतीय प्रधानमन्त्री नरेन्द्र मोदी, उनका पाकिस्तानी समकक्षी सहबाज शरिफ, भारतीय विदेशमन्त्री एश जयशंकर, पाकिस्तानी सेनाप्रमुख असिम मुनिर, भारतका राष्ट्रिय सुरक्षा सल्लाहकार अजित दोभल र उनका पाकिस्तानी समकक्षी असिम मलिकसँग कुराकानी गरेको जानकारी दिए ।

उनले दुबै मुलुक तत्कालै लागू हुनेगरी युद्धविराम गर्न तयार रहेको भन्दै विभिन्न विषयमा तटस्थ स्थानमा वार्ता गर्न तयार भएको पनि जानकारी दिए ।