काठमाडौं– भारतसँग तनाव उत्कर्षमा रहेका बेला पाकिस्तानले आणविक हतियार प्रयोग गर्ने सम्भावना नरहेको बताएको छ । पाकिस्तानी रक्षामन्त्री ख्वाजा आशिफले अहिले आणविक हतियार प्रयोग गर्ने सम्भावना नरहेको जनाएका हुन् ।

पाकिस्तानी टेलिभिजन जियो न्यूजसँगको कुराकानीका क्रममा उनले तत्कालका लागि आणविक हतियार प्रयोग नगर्ने बताए । उनले दुई मुलुकबीच जारी तनाव यस क्षेत्रमा मात्र सीमित नहुने पनि चेतावनी दिए ।

उनले भने, ‘म विश्वलाई भन्दैछु, यो क्षेत्रीय रुपमा मात्र सीमि हुनेछैन, यसले थप विनाश निम्त्याउनेछ ।’ उनले अणविक हतियार प्रयोगबारे राष्ट्रिय कमाण्ड अथोरिटीको बैठक नडाकिएको पनि उल्लेख गरे ।

यस अथोरिटीलाई पाकिस्तानी आणविक हतियारको प्रयोगबारे निर्णय लिने अधिकार दिइएको छ ।