काठमाडौं– र्‍यापर बालेन उर्फ बालेन्द्र शाह काठमाडौं महानगरपालिकाको मेयर बनेदेखि गायनमा सक्रिय छैनन् । उनी व्यवसायिकरुपमा सांगीतिक प्रस्तुति दिन पनि मञ्चमा उक्लिएका छैनन् ।

टेलिसियरल ‘सक्किगोनि’को टिमले निर्माण गर्न लागेको फिल्म ‘लाज शरणम्’मा भने बालेनको गीत समावेश हुने भएको छ । उनको ‘नेपाल हाँसेको’ शीर्षकको गीत फिल्ममा समावेश हुने भएको हो ।

यो गीत बालेन्द्रले १० वर्ष अघि सार्वजनिक गरेका हुन्। उक्त गीतलाई बालेनलाई पुन: रेकर्ड गराएका हुन् ।

‘नेपाल हासेको…’को बोलको गीतमा बालेनको स्वर, संगीत र शब्द छ । गीतले नेपालको वर्तमान अवस्था र विकासको कुरा गर्छ ।

गम्भीर विष्टको केरियोग्राफी गरेको गीतको भिडियोमा फिल्मका मुख्य कलाकारहरु अर्जुन घिमिरे, महेश त्रिपाठी, सागर लम्साल, हरिषा निरौला, वविन राई, गजित विष्ट, रामबाबु रेग्मी, आयुसी ढकाल र सानु पाण्डेको अभिनय रहेको छ ।

बालेन अहिले लोकप्रियताको उत्कर्षमा छन् । उनका स-साना गतिविधि पनि चासोको विषय बन्ने गरेका छन् । उनको स्वर रहेको गीत फिल्ममा राख्दा प्रचारमा सहयोग पुग्ने निर्माण पक्षको अपेक्षा छ ।

‘लाज शरणम्’को केन्द्रीय भूमिकामा सिताराम कट्टेल ‘धर्मुस’ मुख्य भूमिकामा छन् । फागुन १४ बाट प्रदर्शनमा आउने यस फिल्मका निर्देशक कुमार कट्टेल हुन् । जेपिटी क्रियसनको ब्यानरमा निर्माण भएको यस फिल्मका निर्माता नवीन श्रेष्ठ र रामनरेश शाह हुन् ।

हेर्नुहोस् भिडियो :