मोरङ- जिल्लाको लेटाङ नगरपालिका–२ फडानीकी अंशु गौतमको दाहासंस्कार गरिएको छ । उनलाई मंगलबार दिउँसो स्थानीय चिसाङ लोखरा घाटमा धार्मिक परम्पराअनुसार दाहसंस्कार गरिएको हो ।

छिमेकीद्वारा नै बालत्कारपछि हत्या गरिएकी अंशुको अन्तिम बिदाइमा ठूलो संख्यामा स्थानीयवासी सहभागी भए ।

उनलाई परिवारजनका सदस्यले दागबत्ती दिए । अंशुको अन्तिम बिदाइमा लेटाङ नगरपालिकाका प्रमुख भूपेन्द्रकुमार लावती, उपप्रमुख कृष्णकुमारी निरौला, वडाध्यक्ष लगायत जनप्रतिनिधि, स्थानीय सामाजिक अगुवा सर्वसाधारण सहभागी भए ।

मंगलबार बिहानैदेखि अन्तिम दिनेहरूको भीड देखिन्थ्यो । असोज २३ गतेदेखि हराएकी अंशुको शव १८ दिनपछि जंगलमा विभत्स अवस्थामा भेटिएको थियो ।

लामो अनुसन्धानपछि प्रहरीले अंशुको छिमेकीले बलात्कारपछि हत्या गरेको पत्ता लगाएको थियो । उक्त घटनामा संलग्न ५९ वर्षीय पदमबहादुर अधिकारीलाई गत शुक्रबार पक्राउ गरिएको छ।

घटनामा संलग्नलाई प्रहरीले पक्राउ नगरेसम्म परिवारजनले शव बुझेका थिएनन् । उक्त घटनामा संलग्नलाई पक्राउ गरेपछि शव बुझेर दाहासंस्कार गरिएको हो।