काठमाडौं– लुम्बिनीमा भारत–नेपाल सांस्कृतिक महोत्सवको तेस्रो संस्करण सम्पन्न भएको छ ।

भारतीय राजदूतावास, लुम्बिनी विकास कोष र लुम्बिनी बौद्ध विश्वविद्यालयको सहकार्यमा भएको कार्यक्रमको लुम्बिनी प्रदेशका प्रदेश प्रमुख कृष्णबहादुर घर्ती मगर, भारत सरकारका विदेश मन्त्रालयका अतिरिक्त सचिव (उत्तर) मुनु महावर, लुम्बिनी विकास कोषका उपाध्यक्ष डा. ल्हारक्याल लामा र भारतीय राजदूतावासका नियोग उपप्रमुख डा. राकेश पाण्डेले संयुक्त रूपमा उद्‌घाटन गरेका थिए ।

महोत्सवले बौद्ध धर्म केन्द्रित सांस्कृतिक सम्पदाको साझा परम्परा प्रदर्शन गरेको भारतीय दूतावासले जनाएको छ । भारतबाट आएको ६ सदस्यीय आईसीसीआर समूहले सन्ध्या कुञ्जन मेनन दासको नेतृत्वमा बौद्ध विषयवस्तुमा आधारित ओडिसी नृत्य प्रस्तुत गरेको थियो । साँझमा नेपाली ब्यान्ड ‘घुगु मुगु’ ले परम्परागत सङ्गीतको प्रस्तुती दिएको थियो ।

यसअघि बिहान बिहान लुम्बिनी बौद्ध विश्वविद्यालयमा ‘इन्डिया–नेपाल बुद्धिस्ट हेरिटेज : अ कमन लिगेसी’ शीर्षकको शैक्षिक गोष्ठी भएको थियो ।

भारत र नेपालका बौद्ध विशेषज्ञहरूले साझा सम्पदाले दुई देशबीचको सांस्कृतिक सम्बन्ध कसरी गहिरो बनाएको छ भन्ने विषयमा आफ्ना धारणा राखेका थिए । 

कार्यक्रमले नेपाल र भारतबीच रहेको ऐतिहासिक र सांस्कृतिक नाता अझ मजबुत बनाएको भारतीय राजदूतावासले जनाएको छ ।

कार्यक्रममा नागरिक समाजका सदस्य, शिक्षाविद, वरिष्ठ भिक्षु र लुम्बिनी विकास कोषका सदस्यहरूको उपस्थिति थियो ।