काठमाडौं – टी-२० विश्वकप एसिया–इस्ट एसिया प्यासिफिक छनोट प्रतिस्पर्धाको पहिलो खेलमा नेपालले कुवेतमाथि ५८ शानदार जित निकाल्दा नेपालले ब्याट, बल र फिल्ड सबैतिर उत्कृष्ट खेल प्रदर्शन गरेको छ ।

१४२ रनको लक्ष्य पछ्याएको कुवेतलाई १८.१ ओभरमा ८३ रनमा अलआउट गर्दा नेपालको खेल प्रशंसा योग्य बनेको हो । नेपालविरुद्ध कुवेतका तीनबाहेक कुनै ब्याट्सम्यानले दोहोरो अंकमा रन जोड्न सकेनन् ।

कठिन मैदानमा ओपनर कुशल भुर्तेलको सुझबुझपूर्ण ब्याटिङमा गुल्सन झाले साथ दिँदा खेल रोचक बनेको थियो । अन्तिम ओभरसम्म टिकेर खेलेका कुशलले ५६ बलको सामना गर्दा तीन चौका र तीन छक्काको मद्दतमा ६६ रन बनाए ।

अन्तिम समयमा आक्रामक ब्याटिङ गर्दै गुल्शन झाले ६ बलको सामना गर्दा तीन छक्का प्रहार गर्दै २० रन बनाएर कुवेतमाथि नेपाको दबदबा पेश गरे । कुवेतविरुद्ध दीपेन्द्रको २० रन जोड्दा कप्तान रोहित पौडेलको १६ रनको योगदान दिए । खराब सुरुवात गरेको नेपालले पूरै २० ओभर खेल्दा १४१ रन बनाउँदै सम्मानजनक योगफल खडा गरेको हो ।

मैदानमा दीपेन्द्र ऐरीको रन जोड्न दौडिने शैलीको चर्चा कमेन्टेटरले नेपालीको मन छुने शैलीमै गर्दै थिए । ऐरीले कुवेतका क्लिन्टो एन्टोलाई रन आउट गरेको दृश्यको वर्णनमा कमेन्टेटरले भने, ‘दीपेन्द्रले जे छुन्छन् त्यो सुन हुन्छ ।’ त्यसपछिको उनको सेलिब्रेसनले सामाजिक सञ्जाल तातेको छ ।

१४२ रनको लक्ष्य पछ्याएको कुवेतविरुद्ध सुरुकै ओभरमा विकेट लिएर सोमपाल कामीले नेपाली फ्यानलाई खुशी दिएका थिए । पहिलो विकेटले नेपाली खेलाडीमा उत्साह थपिएको थियो । नन्दन यादवको अर्को विकेटले नेपाल खेलमा फर्किएको थियो ।

सन्दीप लामिछानेले दुई ओभर बलिङ गर्दा धेरै रन खाएपछि नेपाली फ्यान निराश बनेका थिए । रोहितले केही ब्रेक दिएर सन्दीपलाई फेरि बल दिँदा मेडनसहित दुई विकेट लिए । उनले चार ओभर बलिङ गर्दा २२ रन खर्चिएर एक मेडनसहित २२ रन खर्चिए ।

कसिलो बलिङ गरेका ललित राजवंशीले चार ओभरमा १७ रन खर्चिएर दुई विकेट हात पार्दा कप्तान रोहित पौडेलले दुई ओभर बलिङ गर्दा मात्र ९ रन दिएर दुई विकेट हात पारे ।

सम्हालिएर ब्याटिङ गर्दै शानदार अर्धशतक बनाएका कुशलले बलिङ र फिल्डिङमासमेत उत्कृष्ट प्रदर्शन गरे । उनले एक ओभर एक बल बलिङ गर्दा ६ रन दिएर एक विकेट निकाले । नन्दन यादवले दुई ओभर बलिङ गर्दा ११ रन खर्चिएर एक विकेट झारे ।

नेपाल टी–२० विश्वकपमा प्रवेश गर्न एक खेल टाढा छ । कुवेतमाथिको शानदार जितसँगै नेपालको विश्वकप प्रवेश गर्ने ढोका खुलेको छ । शुक्रबार जापानमाथि जित निकाल्दै नेपाल विश्वकप खेल्न चाहन्छ ।