काठमाडौं- गएराति सम्पन्न यूएफा नेशन्स लिगको फाइनल खेलका क्रममा दुर्घटना हुँदा एक दर्शकको मृत्यु भएको छ । जर्मनीको म्युनिख शहरस्थित आलियान्ज एरिनामा सम्पन्न खेलमा रंगशालाबाट खसेर एक दर्शकको मृत्यु भएको हो ।

घटनामा एक जनाको ज्यान गएको यूएफाका अधिकारीले समाचार संस्थालाई पुष्टि गरेका छन् । स्पेन र पोर्चुगलबीच सम्पन्न खेलमा थपिएको समयमा घटना भएको जनाइएको छ । खेल पोर्चुगलले जितेको थियो । पोर्चुगलले स्पेनलाई पेनाल्टी शुटआउटमा ५–३ गोलअन्तरले हरायो ।

निर्धारित समय र थपिएको समयमा पनि २–२ गोलको बराबरी भएपछि खेल पेनाल्टी शुटआउटमा धकेलिएको थियो । खेलमा स्पेनका लागि मार्टिन जुबिमेन्डीले २१ औँ मिनेटमा गोल गरेका थिए ।

त्यसपछि पोर्चुगलका नुनो मेन्डेसले गोल गर्दै बराबरी गरेका थिए । खेलको ४५ औँ मिनेटमा स्पेनका मिकेल ओयारजाबालले गोल गरे । क्रिस्टियानो रोनाल्डोले ६१ औँ मिनेटमा पोर्चुगलका लागि बराबरी गोल फर्काएका थिए ।

स्पेनका प्रशिक्षक लुइस डे ला फुएन्टेले खेलपछिको सम्मेलनका क्रममा घटनाबारे जानकारी दिएका थिए । उनले मृतकप्रति श्रद्धाञ्जली पनि दिए ।