काठमाडौं– गत चैत्र १५ गते काठमाडौंको तीनकुने क्षेत्रमा भएको राजावादीहरूको प्रदर्शनले हिंसात्मक रूप लिँदा दुईजनाको ज्यान जानुका साथै थुप्रै मानिस घाइते भएका थिए ।

यस्तै, केही सार्वजनिक तथा निजी संरचनाहरूमा तोडफोड र आगजनी भएको थियो । जसबाट जडिबुटी उत्पादन तथा प्रशोधन कम्पनी पनि सुरक्षित रहन सकेन ।

कम्पनीको प्रशासनिक भवन तोडफोड भएको थियो भने उत्पादन तथा प्रयोगशाला भवनमा आगो लगाइँदा पूर्ण रुपमा ध्वस्त भएको थियो ।

यस कम्पनीले खेती, प्रशोधन, उत्पादन र बजारिकरणको काम गर्ने भएकाले खेती र प्रशोधन कम्पनीको बाहिरी शाखाहरूले गर्ने र उत्पादित बस्तुको बजारिकरण देखिएका कामहरू केन्द्रीय कार्यलयले गर्ने हुँदा सो घटनाको लगभग एक महिना सबै जसो काम ठप्प भएको कम्पनीका निमित्त महाप्रबन्धक उषा रिजालले जानकारी दिइन् ।

उनले घटनाको दुई महिनामै महिनामै कम्पनीले उत्पादन थालेको जानकारी दिइन् । यस कार्यका लागि वन तथा वातावरण मन्त्रालयको सहजीकरण र सङ्घीय सचिवालय निर्माण तथा व्यवस्थापन कार्यालयले प्रशासनिक भवनमा सिसा राख्न सहयोग गरेको र उत्पादन भवनको कम क्षति भएको कोठा सफा गरी त्यहीँबाट तत्काल अस्थायी रूपमा उत्पादन सुरु गरिएको रिजालले बताइन् ।

आगलागी हुनु पहिले मेसिनको प्रयोग गरी उत्पादन गरिने भए पनि मेसिन पूर्ण रुपमा जलेका कारण अहिले सम्पूर्ण काम कर्मचारीले नै गर्नु परेको छ । जसका कारण कम्पनी पूर्ण क्षमतामा चल्न सकेको छैन । अहिले ५० देखि ६० प्रतिशत मात्र उत्पादन भइरहेको छ ।