काठमाडौं – परिच्छेद सेनको निर्देशनमा बन्न लागेको फिल्ममा नायिका वर्षा सिवाकोटी अनुबन्ध भएकी छन् । उनले बिहीबार कागजी सम्झौता गरेको निर्माण पक्षले शुक्रबार सार्वजनिक गरेको हो ।

पल शाह केन्द्रीय नायक रहने भनिएको यो फिल्म निर्माणको घोषणा गत वर्षको माघ गरिएको थियो । फिल्मको प्रदर्शन मिति आगामी असोज १३ गते फूलपातीलाई तोकिएको छ ।

प्रदर्शन मिति आउन ५ महिना बाँकी रहँदा पनि यस फिल्मको छायाङ्कन सुरु भएको छैन । वैशाखमा बल्ल निर्माण टिम कलाकार चयनमा तातेको छ ।

निर्माण पक्षले वैशाख १७ मा नायक रमेश उप्रेतीलाई अनुबन्ध गरेको थियो भने गत यही बुधबार नायक आर्यन सिग्देल अनुबन्ध भएका छन् ।

३ महिनाअघि फिल्म निर्माण घोषण भएको यस फिल्ममा तीन नायक अनुबन्ध भइसक्दा पनि नायिकाको टुंगो लागेको थिएन । यही अवस्थामा वर्षा फाइनल भएकी हुन् ।

यी चारसहित कलाकारमा जयकिशन बस्नेत फाइनल भइसक्दा पनि निर्माण टिमले छायाङ्कनबारे जानकारी दिएको छैन । अझै छायाङ्कनमा ढिलो भएको अवस्थामा फूलपातीमा यस फिल्म प्रदर्शनमा ल्याउन निर्देशक सेनलाई चुनौती पर्ने देखिन्छ ।

यस फिल्मको लेखक निर्देशक सेन आफैँ हुन् । प्रस्तुतकर्ता विराज बिष्ट यस फिल्मक निर्माताहरु टोपेन्द्र विष्ट, चक्रबहादुर केसी र रवि खड्का हुन् ।