काठमाडौं– उपप्रधानमन्त्री एवम् सहरी विकासमन्त्री प्रकाशमान सिंहले मन्त्रालय मातहतका विभाग प्रमुखहरूसँग लिखित कार्ययोजना माग गरेका छन् ।

पटकपटक समीक्षा भएर पनि काम नभएपछि उनले मन्त्रालय मातहतका विभाग प्रमुखहरूसँग लिखित कार्ययोजना माग गरेका हुन् । सहरी विकास मन्त्रालयअन्तर्गतका विभागीय प्रमुखहरूसँग चालु आर्थिक वर्षमा भएका कामहरूको समीक्षा बैठकमा मन्त्री सिंहले कार्यप्रगतिलाई लिएर चित्त बुझाउने ठाउँ नदेखिएको बताए । 

बैठकमा विभागका प्रमुखहरूले आफ्नो विभागको कार्यप्रगतिबारे जानकारी गराएका थिए । कार्यप्रगति सन्तोषजनक नदेखिएको भन्दै उपप्रधानमन्त्री सिंहले समीक्षा बैठकमा भएका कुरालाई गम्भीरताका साथ पालना गर्दै परिणाम निकाल्ने गरी काम गर्न निर्देशन दिए । 

उपप्रधानमन्त्री सिंहले विभागीय प्रमुखहरूसँग तीन दिनभित्र लिखित कार्ययोजना पेस गर्न निर्देशन दिएको बैठकमा सहभागि एक विभाग प्रमुखले जानकारी दिए । 

नीतिगत रुपमा र विभागलाई काम गर्ने क्रममा आउने समस्याको समाधानका लागि मन्त्रीको तहबाट समाधानका लागि पहल गर्ने भने पनि विभागहरूको कार्यक्षमतामा सुधार नदेखिएको भन्दै सिंह असन्तुष्ट छन् ।