नवलपुर (नवलपरासी)- मङ्गलबार साँझ नारायणी नदीमा डुबेर बेपत्ता भएका दुईजना दिदीभाइको शव फेला भेटिएको छ ।

नवलपरासी (बर्दघाट–सुस्तापूर्व)को गैँडाकोट–१ स्थित ब्रिटिश क्याम्पनजिकै नारायणी नदीमा डुबेर बेपत्ता भएका उनीहरूको शव बुधबार दिउँसो त्यहीँ फेला परेको हो ।

नदीमा बेपत्ता भएका गैँडाकोट–१ का विष्णु सेर्पुञ्जाकी १३ वर्षीया छोरी दीक्षा र नौ वर्षीय छोरा स्वपनिलको शव आज सशस्त्र प्रहरी बल १७ नम्बर गण भरतपुरबाट खटिएको गोताखोरको टोलीले फेला पारेको हो ।

इलाका प्रहरी कार्यालय गैँडाकोटका निमित्त प्रमुख प्रहरी नायब निरीक्षक सानुकाजी विष्टले उनीहरु डुबेको ठाउँ नजिकै दिदीभाइको शव फेला परेको जानकारी दिए ।

’आज बिहानैबाट दुवै जनाको खोजी गरिएको थियो’, उनले भने, ‘दुवै जनाको शव दिउँसो १२ः३० बजेतिर फेला पार्न सफल भयौँ।‘

उनीहरूको शव पोष्टमार्टमका लागि भरतपुरस्थित भरतपुर सङ्घीय अस्पतालमा पठाइएको विष्टले जानकारी दिए ।

दुवै बालबालिका हजुरआमा सुनमाया कुमालसँग मङ्गलबार साँझ नारायणी नदीमा गएका थिए । घर फर्किने बेला हजुरआमाको चप्पल छुटेर लिन जाँदा उनीहरू नदीमा बेपत्ता भएका थिए ।