बागलुङ – बागलुङको कालिका मन्दिरमा यस पटकको चैतेदसैँ (नवरात्रि) को अवसरमा ४२ लाख ६३ हजार १५५ रुपैयाँ भेटी सङ्कलन भएको छ ।

कालिका भगवती गुठी व्यवस्थापन समितिका अध्यक्ष कुमार खड्काका अनुसार यस वर्ष चैतेदसैँको दिन (अष्टमी) मा सबैभन्दा बढी भेटी सङ्कलन भएको हो । अष्टमीका दिन ११ लाख ८१ हजार ५ सय ९० रुपैयाँ सङ्कलन भएको छ ।

खड्काले गतवर्ष चैतेदसैँको तुलनामा यस वर्ष एक लाख ९० हजार ५ सय ९७ रुपैयाँ बढी भेटी सङ्कलन भएको बताए । मन्दिर दर्शन गर्ने भक्तजनले भेटी, नगद सहयोग र बलिलगायतबाट उक्त भेटी चढाएका हुन् । कालिका मन्दिरमा बडादसैँ र चैतेदसैँमा सबैभन्दा बढी भेटी सङ्कलन हुँदै आएको छ ।

चैतेदसैँ अवधिभर छ लाख बढी दर्शनार्थीले कालिका मन्दिरको दर्शन गरेको अध्यक्ष खड्काको भनाइ छ । उनले गत वर्षको चैतेदसैँमा भन्दा अहिले बढी दर्शनार्थीले मन्दिरको दर्शन गर्दा भेटी सङ्कलनमा वृद्धि भएको बताए । अष्टमीका दिनमा मात्र तीन लाख रुपैयाँ भक्तजनले मन्दिरको दर्शन गरेको अध्यक्ष खड्काको भनाइ छ ।

चैतेदसैँमा बागलुङ कालिका मन्दिर परिसरमा यस वर्ष धार्मिक सम्मेलन र मेलाको आयोजना गरिएको थियो । कालिका मन्दिर गण्डकी प्रदेशको प्रसिद्ध शक्तिपीठका रुपमा रहेको छ ।