काठमाडौं– न्यूयोर्कस्थित संघीय अदालतले अमेरिकी प्रसिद्ध र्‍यापर शन ‘डीडी’ कम्ब्सलाई महिला उत्पीडन, यौन दुर्व्यवहारको आरोपमा ४ वर्ष २ महिनाको जेल सजाय सुनाएको छ। अदालतले उनलाई ५०,००० अमेरिकी डलर जरिवाना तिर्न पनि आदेश दिएको छ।

यो फैसला अक्टोबर ३ मा अमेरिकी जिल्ला न्यायाधीश अरुण सुब्रमण्यमले सुनाएका हुन्। फैसलामा कम्ब्सलाई यातना, हिंसा, यौन दुर्व्यवहार र सनकी पार्टी आयोजना गरी महिलालाई शोषण गरेको अभियोगमा दोषी ठहर गरियो। तर, उनी मानव बेचबिखनको मुख्य अभियोगबाट भने निर्दोष ठहरिए।

फैसला सुनाउँदै न्यायाधीशले भने, ‘तिमीले पीडितलाई शारीरिक, भावनात्मक र मानसिक रूपमा दुर्व्यवहार गर्यौं। महिला विरुद्ध हुने शोषण र हिंसाका लागि समाजले जवाफदेहिता माग्छ, र आजको फैसला त्यसकै सन्देश हो।’

सुनुवाइका क्रममा ५४ वर्षीय कम्ब्स अदालतमा रुँदै दयाको याचना गर्दै आमा र बच्चासँग माफी मागेका थिए। अदालतले भने पीडितलाई न्याय दिलाउन कडा सजाय जरुरी भएको बतायो।

कम्ब्समाथि मुद्दा उनकी पूर्व प्रेमिका गायिका क्यासी भेन्चुरा र एक अज्ञात पीडित महिलाले दायर गरेका थिए। उनीहरूले कम्ब्सलाई ठगी, यौन बेचबिखनमा संलग्नता, र वेश्यावृत्तिका लागि महिला ओसारपसार गरेको आरोप लगाएका थिए।

यो मुद्दाले अमेरिकी मनोरञ्जन क्षेत्र र समाजमा महिला विरुद्ध हुने शोषण र हिंसाप्रति पुनः बहस सुरु गराएको छ। कानुनविद्हरूले यस फैसलालाई पीडितका लागि न्याय र अन्यलाई चेतावनी दुवै भएको टिप्पणी गरेका छन्।