काठमाडौँ – इन्स्टिच्युट फर स्ट्राटेजिक एण्ड सोसियो इकोनोमिक रिसर्च (आइएसएसआर) ले दरबारमार्गस्थित पेभेलियन हलमा ‘अर्थतन्त्रलाई पुनरुत्थान गर्न नेपाल राष्ट्र बैङ्कको भूमिका’ विषयक नीति संवाद कार्यक्रम आयोजना गरेको छ ।

शुक्रबार आयोजित नीति संवादका प्रमुख अतिथि नेपाल राष्ट्र बैङ्कका गभर्नर डा. विश्व पौडेल थिए । पूर्वप्रधानन्यायाधीश डा. कल्याण श्रेष्ठको सभापतित्वमा आयोजित कार्यक्रमलाई नेपाल सरकारका पूर्वमुख्यसचिव एवम्‌ आइएसएसआरका अध्यक्ष डा. शङ्करदास बैरागीले सहजीकरण गरेका थिए ।

प्रमुख अतिथि डा. पौडेलले आर्थिक विकास निम्ति राष्ट्र बैङ्कबाट आफूले ठूलो धक्का (बिग पुस) दिन नसक्ने, बरु सरकारले नै लगानी र विकासमा गाम्भीर्यता देखाउनुपर्ने धारणा राखे ।

पूर्वप्रधानन्यायाधीश एवम्‌ कार्यक्रमका सभापति डा. श्रेष्ठले मुलुकको आर्थिक विकासमा केन्द्रीय बैङ्कको निहीत जवाफदेहिता रहेको उल्लेख गर्दैए राष्ट्रको अर्थतन्त्र उत्थान गर्न मौद्रिक नियामकले भूमिका खेल्नुपर्ने बताए ।

‘’एकातिर हामी विकासशील मुलुकमा स्तरोन्नति हुँदैछौँ, त्यसनिम्ति हामीले धेरै काम गर्नुपर्नेछ, अर्कातर्फ संविधानअनुरुप राज्यका दायित्व पनि बढ्दैछन्‌’, डा. श्रेष्ठले भने, ‘अर्थतन्त्रमा उत्पादनशील पुनरुत्थान आवश्यक छ, राष्ट्र बैङ्कले ल्याएको मौद्रिक नीति र सरकारले ल्याएको वित्त नीतिबीच सामञ्जस्य हुनुपर्छ ।’

आइएसएसआरका अध्यक्ष डा. बैरागीले देशको पछिल्लो आर्थिक तथा वित्तीय स्थितिबारे केही सूचक उल्लेख गर्दै अर्थतन्त्रले झेलिरहेका संरचनागत चुनौती र समाधानका उपाय मन्थन गर्न नीति संवाद आयोजना गरिएको बताए ।

कार्यक्रममा व्यवसायी तथा सरोकारवालाहरूले गभर्नर पौडेलसँग अर्थतन्त्र र व्यवसायका समस्या तथा समाधानबारे धारणा राखेका थिए । गभर्नर पौडेलले व्यवसायीका ती सवालमा आफ्नो जवाफ दिएका थिए ।

कार्यक्रमका तस्बिरहरु-