काठमाडौं- आईसीसी विश्वकप क्रिकेट लिग–२ मा आइतबार भइरहेको खेलमा नेपालले स्कटल्यान्डविरुद्ध बलिङ गरिरहेको छ ।

स्कटल्यान्डका कप्तान रिची बेरिङटनले टस जितेपछि डन्डीको फोर्टहिलमा नेपालले बलिङको निम्तो पाएको हो ।

खेलमा स्कटल्यान्डले पाचौँ विकेट गुमाएको छ । ३१ ओभर ६ बलमा दीपेन्द्रसिंह ऐरीले स्कटल्यान्डका म्याथ्यु क्रसलाई पेभेलियन फर्काए । आउट हुनुअघि उनले ७ बलमा ३ रन जोडेका थिए ।

नेपालले गत बुधवार स्कटल्याण्डको डुन्डीमा भएको खेलमा नेदरल्याण्ड्सलाई ५ विकेटले हराएको थियो ।

त्यसअघि पहिलो खेलमा बलियो मानिएको घरेलु टोलीमाथि नेपालले १ विकेटको रोमाञ्चक जित निकालेको थियो। आइतबार फेरि नेपाल र स्कटल्याण्ड भिडिरहेका छन् ।

नेपाल १४ खेलमा १० अंकका साथ लिगको सातौं स्थानमा छ भने १७ खेलमा २० अंकका साथ स्कटल्याण्ड चौथो स्थानमा छ ।

सन् २०२७ सम्म चल्ने लिगको अन्तिममा शीर्ष ४ मा रहने टोलीले विश्वकपको ग्लोबल छनोटमा सिधै स्थान बनाउने छन् । पुछारमा रहने ४ टोलीले भने विश्वकप छनोटको प्लेअफ खेल्नुपर्ने छ ।