काठमाडौं– नेपाल धितोपत्र बोर्डका अध्यक्ष सन्तोषनारायण श्रेष्ठले बोर्डको भवन बनाउन जग्गा खरिद प्रक्रिया अन्तिम चरणमा पुगेको बताएका छन् । 

बोर्डको ३३औँ वार्षिकोत्सवका अवसरमा आइतबार ललितपुरमा भएको कार्यक्रममा अध्यक्ष श्रेष्ठले चाँडै भवन निर्माण कार्य सुरु हुने जानकारी गराएका छन् । 

बोर्ड हाल ललितपुरको खुमलटारमा भाडाको भवनमा छ । बोर्डको आफ्नै भवन हुनुपर्ने लामो समयदेखि माग उठ्दै आए पनि बोर्डले आफ्नो भवन भने बनाउन सकेको थिएन । पुँजी बजारको सबैभन्दा ठूलो निकायको आफ्नो भवन समेत नभएको भन्दै बारम्बार आलोचना हुने गरेको थियो । 

बोर्डको नृतत्व गर्ने आएका अन्य अध्यक्षहरूले समेत भवन बनाउने कुरा गरे पनि बनाउन भने सकेका थिएनन् । बोर्डको ३३औँ वार्षिकोत्सव कार्यक्रममा भने अध्यक्ष श्रेष्ठले बोर्डको भवन बनाउन जग्गा किन्ने प्रक्रिया अगाडि बढेको जानकारी दिएका छन् । 

‘हामीले आवश्यक प्रक्रिया पूरा गर्दै जग्गा खरिदलाई अन्तिम चरणमा पुर्‍याएका छौँ’, अध्यक्ष श्रेष्ठले भने, ‘अब चाँडै नै भवन निर्माण कार्य सुरु हुनेछ ।’

कर्मचारीको क्षमता विकास, जिम्मेवारी पुनर्वितरण र उत्प्रेरणाको व्यवस्था गर्नुपर्ने समेत अध्यक्षले बताए । नेपालको पुँजी बजारको नियमन र विकासमा सेबोनको स्थायित्व र पूर्वाधार सुदृढीकरणले नयाँ गति थप्ने श्रेष्ठको भनाई थियो ।