काठमाडौं – अर्थमन्त्री विष्णुप्रसाद पौडेलले सरकार पुँजी बजारको विकास र विस्तारमा सकारात्मक रहेको बताएका छन् । धितोपत्र बोर्डलाई दबाब र प्रभावमा पार्नेहरूबाट सचेत भएर बजार विकासमा लाग्नुपर्ने उनले बताए ।

अर्थमन्त्री पौडेलले आइतबार नेपाल धितोपत्र बोर्डको ३३ औं वार्षिकोत्सव कार्यक्रममा बोल्दै शेयर बजारमा भित्री कारोबार गर्नेलाई कारबाही दायरामा ल्याउन बोर्डलाई आग्रह गरे ।

‘गल्ती गर्नेलाई दण्डित गर्ने र राम्रो काम गर्नेलाई प्रोत्साहन गर्नुपर्छ’, पौडेलले भने, ‘संस्थालाई दबाब र प्रभावमा पार्ने धेरै छन् । त्यस्ताबाट जोगाएर नियमन बढाउनुपर्‍यो ।’ पौडेलले बोर्डको भूमिका गुणात्मक रूपमा सुधार गर्न चाहेको प्रष्ट पारे ।

अर्थमन्त्री पौडेलले बजेटले पुँजी बजारप्रति सरकारको धारणा स्पष्ट पारेको बताए । ‘पुँजी बजारलाई सरकारले प्राथमिकतामा राखेर बजेटमा ल्याएको छ ।’ उनले भने । बजेट अनुसार बोर्डले काम अगाडि बढाउछ भन्ने अपेक्षा रहेको अर्थमन्त्री पौडेलले बताए । उनले भने, ‘बोर्ड इन्साइडर ट्रेडिङको विरुद्ध हुनुपर्छ । साथै, लगानीकर्तालाई लगानीको सचेतना प्रदान गर्नुपर्छ । पुँजी बजारमा नयाँ इन्स्ट्रुमेन्ट भित्रिनु पर्छ ।’

‘बिचौलियाको फन्दामा नपर्नुहोस्’

अर्थमन्त्री पौडेलले नेपाल धितोपत्र बोर्ड बिचौलियाको फन्दामा पर्न नहुने बताए ।

उनले अध्यक्ष सन्तोषनारायण श्रेष्ठलाई आग्रह गर्दै भने, ‘बिचौलियाको फन्दामा नपर्नुहोला ।’ पौडेलले अन्तर्राष्ट्रियस्तरमा उत्कृष्ट रहेको पुँजी बजारको नियामक सरह सेबोनले समेत आफ्नो भूमिका प्रभावकारी बनाउनुपर्ने बताए ।

पुँजी बजार अर्थतन्त्रको ऐना भएकाले पुँजी बजारको माध्यमबाट देशको अर्थतन्त्र सुधार गर्न सक्ने सकिने अर्थमन्त्री पौडेलको भनाइ थियो ।