काठमाडौं– भारतले बुधबार पाकिस्तानी भूमिमा ‘अपरेसन सिन्दुर’ नामक कारवाही गर्‍यो । भारतमा एक दम्पत्तिले सैन्य कारवाहीका दिन जन्मेकी छोरीको नाम सिन्दुरी राखेका छन् ।

बिहार राज्यको कटिहार जिल्लाका दम्पत्तिले छोरीको नाम सिन्दुरी राखेका हुन् । कटिहारको स्थानीय निजी नर्सिङ होममा बुधबार सबेरै सिन्दुरीको जन्म भएको भारतीय समाचार पोर्टल द प्रिन्टले उल्लेख गरेको छ ।

‘भारतले पाकिस्तानमा गरेको आक्रमणको नाम अपरेसन सिन्दुर राखिएको थियो । हाम्री छोरी ७ मे का दिन ९ बजे जन्मिइन्, त्यसैले हामीले उनको नाम सिन्दुरी राख्ने निर्णय गरेका हौँ ।’ सिन्दुरीका मावली हजुरबुवा कुन्दन मण्डललाई उद्धृत गर्दै द प्रिन्टले जनाएको छ ।

उनले सिन्दुरी पछि गएर भारतीय सेनामा भर्ती हुने विश्वास पनि व्यक्त गरे ।

भारतीय अभिभावकले विभिन्न घटना भएका बेला जन्मिने छोराछोरीको अनौठा नाम राख्ने गरेको उदाहरण छन् । यसअघि छत्तीसगढका दम्पत्तिले कोरोना महामारीका बेला जन्मेका जुम्ल्याहाको नाम ‘कोरोना’ र ‘कोभिड’ राखेका थिए ।

त्यस्तै, मध्य प्रदेशका अभिभावकले लकडाउनका बेला जन्मेका छोराको नाम ‘लकडाउन यादव’ राखेका थिए ।