जनकपुरधाम- प्रधानमन्त्री केपी शर्मा ओलीले उत्तरी छिमेकी चीन र दक्षिणी छिमेकी भारतसँग नेपालको सबन्ध नबिग्रिएको दाबी गरेका छन् ।

मधेस प्रदेश सभाको बैठकलाई मंगलबार सम्बोधनका क्रममा प्रधानमन्त्री ओलीले यस्तो दाबी गरेका हुन् ।

‘छिमेकीसँग सबन्ध बिग्रिएको भनेर हल्ला चलाइएको छ, यो सत्य होइन,’ उनले भने, ‘सँगै सुतेकाहरूबीच खुट्टा तलमाथि हुनु स्वाभाविक हो, संवादबाट समस्याको हल गर्ने कोसिस गर्नु पर्छ ।’

ओलीले नेपालका दुई छिमेकीसँगको सम्बन्ध कसैले बिगार्न नसक्ने पनि बताएका छन् । ‘हाम्रा दुई छिमेकीसँग सबन्ध राम्रो छ, यसलाई कसैले बिगार्न सक्दैन’, ओलीले अगाडि भने ।

गत असार ३१ गते प्रधानमन्त्री बनेका ओ‌लीको अझैसम्म भारत भ्रमण हुन नसकेको अवस्थामा सम्बन्ध बिग्रिएको टिप्पणी भइरहेको छ । यही सन्दर्भमा उनले यस्तो बताएका हुन् । भारतले नबोलाएपछि ‌ओली यसअघि मंसिर १७-२० सम्म चीन भ्रमणमा गएका थिए ।