काठमाडौं- नेकपाका महासचिव नेत्रविक्रम चन्द ‘विप्लव’, नेकपा (एकीकृत समाजवादी) का महासचिव घनश्याम भूसाल र प्रगतिशील राष्ट्रिय अभियानका जनार्दन शर्माले संयुक्त वक्तव्य निकाल्दै नयाँ राजनीतिक पहलका लागि आह्वान गरेका छन्।

उनीहरूको वक्तव्यमा हालको सत्ता नेतृत्वलाई गैरजिम्मेवार ठहर गरेका छन् । उनीहरूले राजनीतिक दलहरू जनताबाट टाढा गइरहेको बताएका छन्।

भदौ २३ गतेको जेन-जी आन्दोलन र त्यसपछिका घटनाहरूले दलहरूको असक्षमता उजागर गरेको उनीहरूले उल्लेख गरेका छन् ।

‘पुराना दल र तिनका नेताहरूले पुरानै संरचना र तरिका जोडजाड गरेर आफ्नो वर्चस्व बचाउन खोज्नु मुलुकलाई अझ संकटतर्फ धकेल्ने कार्य हो,’ उनीहरूले भनेका छन्।

संयुक्त वक्तव्यमा जनता गहिरिँदो निराशा र राष्ट्रिय असुरक्षाबारे चर्चा गर्दै मुलुकलाई प्रगतिशील र लोकतान्त्रिक दिशातर्फ लैजान अब बृहत् मोर्चावन्दीको आवश्यकता रहेको निष्कर्ष निकालिएको छ।

तीन नेताहरूले भनेका छन्, ‘राष्ट्रमाथि आएको चौतर्फी संकटको सामना गर्न सबै प्रतिवद्ध कम्युनिस्ट, समाजवादी, प्रगतिशील र देशभक्तहरूले एकताबद्ध भई ऐतिहासिक पहल लिनुपर्छ।’

वक्तव्यमार्फत उनीहरूले समान विचार र प्रतिवद्धता भएका सबै पक्षसँग संवाद, छलफल र सहकार्यको लागि आह्वान गरेका छन्।

यो संयुक्त वक्तव्यले नेपाली वाम राजनीतिमा नयाँ पुनर्संरेखनको संकेत गरेको विश्लेषण राजनीतिक वृत्तमा गरिएको छ।