काठमाडौं– बलिउडका लोकप्रिय जोडी कट्रिना कैफ र विक्की कौशलले आफ्नो पहिलो सन्तानको स्वागत गरेका छन्। दुवैले शुक्रबार सामाजिक सञ्जाल इन्स्टाग्राममार्फत पुत्रलाभको खबर सार्वजनिक गरेका हुन् ।

यसअघि, सेप्टेम्बर २३ मा दम्पतीले आफ्नो पहिलो सन्तानको अपेक्षा गरिरहेको घोषणा गरेका थिए। उनीहरूले त्यसबेला लेखेका थिए, ‘हामी आनन्द र कृतज्ञताले भरिएको हृदयका साथ हाम्रो जीवनको सबैभन्दा राम्रो अध्याय सुरु गर्न लागेका छौं।’

कट्रिना र विक्कीको प्रेमकथा बलिउडका चर्चित रोमान्समध्ये एक हो। उनीहरूबीचको पहिलो भेट सन् २०१९ को स्क्रिन अवार्ड कार्यक्रममा भएको थियो, जुन विक्की कौशलले होस्ट गरेका थिए। त्यसपछि उनीहरूको सम्बन्ध बलियो बन्दै गएको थियो।

दुवैले सन् २०२१ डिसेम्बरमा राजस्थानको सवाई माधोपुरस्थित ‘सिक्स सेन्सेस फोर्ट बारा’मा गोप्य रूपमा विवाह गरेका थिए। अहिले उनीहरू बलिउडका सबैभन्दा प्रिय र चर्चित जोडीमध्ये एक मानिन्छन्।

कट्रिना र विक्कीले अभिभावक बनेसँगै प्रशंसक र सहकलाकारहरूले सामाजिक सञ्जालमा बधाई दिइरहेका छन् ।