काठमाडौं – नायक पल शाह स्टारर पाँचौँ सातामा प्रदर्शनरत फिल्म ‘मोहर’ले भाग्यशाली ९ दर्शकलाई ‘सुनको मोहर’ दिने घोषणा गरेको छ ।

हलमा पुगेर यो फिल्म हेर्ने ९ दर्शकले लक्की ड्रमार्फत् सुनको मोहर पाउने निर्माण पक्षले आइतबार घोषणा गरेको हो ।

चितनवको म्याङ्गो हलका तीन, सिटी स्क्वायर, कीर्तिपुर सिनेप्लेक्स र रञ्जना सिनेप्लेक्सका दुई-दुई गरी ९ दर्शकलाई मोहर दिन लागिएको हो ।

निर्माण पक्षका अनुसार ‘मोहर’ पाउने दर्शक लक्की ड्रबाट चयन हुनेछन् ।

मोहर जित्नका लागि दर्शक प्रक्रियामा जानुपर्नेछ । माथि तोकिएका फिल्म हलमा एक बक्स राखिएको छ । फिल्म हेर्न आफूले लिएको टिकटको पछाडिपछि नाम र नम्बर लेखेर उक्त बक्समा राख्नुपर्नेछ ।

भदौ २३ गते असोज ११ गतेसम्म फिल्म हेर्ने दर्शक मात्रै यस लक्की ड्रमा सहभागी हुन पाउने निर्माण पक्षले बताएको छ ।

लक्की ड्रबाट विजेता चयन गरी ‘सुनको मोहर’ फिल्म प्रदर्शनको ५१ दिने कार्यक्रममा वितरण गरिने निर्माण पक्षले जनाएको छ ।

‘मोहर’ भदौ २३ देखि प्रदर्शनरत छ । चलचित्र विकास बोर्डको रिपोर्टअनुसार यस फिल्मले ५ करोडभन्दा बढी व्यापार गरिसकेको छ ।

यो आँकडालाई हिट मान्ने प्रचलन छ । सँगै यो ‘मोहर’ यस वर्षेको दोस्रो हिट फिल्म बनेको छ ।

यस फिल्ममा पलसहित नायिका नीति शाह र बेनिशा हमाल शीर्ष भूमिकामा छन् । ओम प्रतीकको लेखन र निर्देशनमा यो फिल्म बनेको हो । निर्माता चुम्बन जंग शाही हुन् ।