काठमाडौं– कर्तव्य ज्यान मार्ने उद्योग मुद्दाका फरार प्रतिवादी १९ वर्षपछि पक्राउ परेका छन् । पक्राउ पर्नेमा सुनसरी घर भई नागार्जुन बस्ने ३८ वर्षीय संदिप धामी भन्ने रूपलाल धामी रहेका छन् ।

वीर बहादुर मोक्तानको जाहेरीले धामीमाथि कर्तव्य ज्यान र ज्यान मार्ने उद्योग मुद्दामा सुनसरी जिल्ला अदालतको मुद्दा नम्बर ०७४-सीआर-०३९४ को निर्णय नं. १५१, मिति २०७५ साल फागुन २८ गतेको फैसलामा उक्त घटनाका प्रतिवादीहरूलाई जन्मकैद हुने ठहर गरेको थियो । 

प्रतिवादीहरू मध्यका संदिप धामी काठमाडौंमा लुकिछिपी बसिरहेको भन्ने विशेष सूचनाको आधारमा काठमाडौं उपत्यका अपराध अनुसन्धान कार्यालयबाट खटेको प्रहरी टोलीले मंगलबार सामाखुसीमा फेला पारी पक्राउ गरेको हो । 

उनीमाथि थप अनुसन्धान तथा आवश्यक कारबाहीको लागि इलाका प्रहरी कार्यालय,महेन्द्रनगर चक्रघट्टी, सुनसरी पठाइएको प्रहरीले जनाएको छ ।