काठमाडौं – गत वर्षको असोजमा प्रदर्शनमा आएको फिल्म ‘आँखा’ की नायिका स्मिता लामिछानेले नयाँ फिल्म साइन गरेकी छन् । अनिल बूढा मगरको निर्देशनमा बन्न लागेको फिल्म ‘मितज्यू’ मा उनी अनुबन्ध भएकी हुन् ।

स्मिताको जन्मदिनको अवसर पारेर फिल्म निर्माण पक्षले बुधबार उनी अनुबन्ध भएको सार्वजनिक गरेको हो । उनी शीर्ष मध्यको एक भूमिकामा अनुबन्ध भएको बताइएको छ ।

यो फिल्ममा यसअघि नै नायक दयाहाङ राई र डान्सर तेरिया मगर अनुबन्ध भइसकेका छन् । ‘मितज्यू’ गत वर्ष प्रदर्शनमा आएको हिट फिल्म ‘घर ज्वाइँ’ टिमले निर्माण गर्न लागेको हो ।

जीएम मूभिज प्रोडक्सन र एबीएम सिने प्रोडक्सनमा बन्ने यो फिल्मको लेखक महेश राई हुन् । फिल्मको प्रदर्शन मिति आगामी चैत २७ लाई तोकिएको छ ।

स्मिता लामिछाने निर्मात्रीसमेत हुन् । उनले फिल्म ‘१२ सत्ताई’ बाट डेब्यू गरेकी हुन् । उनी मुख्य भूमिकामा रहने फिल्म ‘म राजेश हमाल’ भने प्रदर्शनमा आएको छैन ।