काठमाडौं– पाकिस्तानले भारतका एक शीर्ष कूटनीतिज्ञलाई बोलाएर भारतले गरेको हवाई आक्रमणको विरोध गरेको छ । पाकिस्तानको विदेश मन्त्रालयले बयान जारी गर्दै भारतका एक शीर्ष कूटनीतिज्ञलाई बोलाएर गएराति पाकिस्तानमा गरिएको हवाई आक्रमणको विरोध गरेको हो ।

पाकिस्तानले एक शीर्ष भारतीय कूटनीतिज्ञलाई बोलाएर भारतको हवाई आक्रमणप्रति कडा विरोध दर्ज गरेको बीबीसी हिन्दीको अनलाइन संस्करणमा समाचार प्रकाशित छ । बयानमा आक्रमणबाट महिला र बालबालिकासहित कयौँ नागरिक मारिएको उल्लेख छ । पाकिस्तानको विदेश मन्त्रालयले भारतीय कूटनीतिज्ञसँग हवाई आक्रमण पाकिस्तानको सम्प्रभुताको स्पष्ट उल्लंघन भएको बताएको छ ।

पाकिस्तानले आक्रमणलाई अन्तर्राष्ट्रिय कानुन, संयुक्त राष्ट्र संघको बडापत्र र दुई देशबीचको सम्बन्धलाई नियन्त्रण गर्ने परम्पराको पनि उल्लंघन भनेको छ ।

बयानमा पाकिस्तानले भारतलाई यस प्रकारको गैरजिम्मेवार व्यवहारले क्षेत्रीय शान्ति र सुरक्षाका लागि गम्भीर खतरा उत्पन्न गर्ने चेतावनीसमेत दिइएको बीबीसीले जनाएको छ ।

समाचारमा पाकिस्तानी विदेश मन्त्रालयले बोलाएका ती भारतीय कूटनीतिज्ञको नाम भने खुलाइएको छैन ।